作為一個創業者或者中小企東主，你同時有好多事要處理，對於點整一個網站可能都無咩太多諗法。而一個網站只單止係品牌形像嘅一部份，同時喺幫助你實現業務目標嘅重要資產，例如可以帶來產品銷售、服務查詢、接觸更多目標客戶、與目標客戶建立關係等等。然而要建立一個幫到你生意嘅網站可以係一個令人畏懼嘅任務，因為你未必清楚點樣整網站、點樣配合現有行銷策略、及設計技巧等等。而呢個時侯就係搵專業嘅網頁設計公司幫手嘅時侯。而喺搵網頁設計公司洽詢之前，有7件事你應該要思考一下或者準備好，等對方更容易同清晰地明白你嘅網站需求，以確保項目成功。
整網站前要準備嘅7件事
- 訂立網站目標
- 研究競爭對手
- 尋找心儀網站作參考
- 選擇域名
- 收集網站內容
- 預計網站推出期限
- 確定預算
訂立網站目標
喺整網站之前，確定你嘅網站目標同需求係至關重要。你想你嘅網站幫你做到啲咩？你想吸引潛在客戶、喺網上直接銷售產品，定係向你嘅客戶提供自助服務？而且仲要考慮一下有啲咩功能喺需要。例如Blog、訂閱電子報、WhatsApp整合、預約系統、多種站言、網上付款等等。
研究競爭對手
睇下你嘅競爭對手網站，從設計、內容及功能上，睇下佢哋有咩做得好同可以改進嘅地方。咁樣可以幫助你更容易訂立網站目標同需求、更可確保你嘅網站追上甚至超越競爭對手。
尋找心儀網站作參考
心儀嘅網站可以係競爭對手網站或者任何嘅網站。因為網頁設計同設計本身一樣都係喺形象化嘅事，好難三言兩語就溝通到，「有圖有真相」就係最好嘅方法。同時可以等網頁設計公司更清晰地了解喺圖像設計、載入動畫、文字風格、及網站功能上嘅需求。
選擇域名
域名係組成網站網址嘅重要部份。所以建議選擇一個容易記住並與品牌名稱或業務相關嘅域名。如果心儀嘅.com比人註冊咗，亦可以選擇唔同嘅域名，例如.hk/.io/.ai等等。如果你需要幫助選擇域名，網頁設計公司一般都會為你提供幫助及建議。
收集網站內容
收集並整理你想要包含喺網站上嘅所有內容，包括文字、圖像和影片。咁樣會有助網頁設計公司了解你嘅諗法、規劃網站架構、並確保你的網站內容具有連貫性。更重要嘅係了解你是否需要相關服務，例如文案創作、攝影服務、圖像設計等等。另外亦可簡單製作一個Sitemap，不過未必需要用專用軟件製作，只需以點列方式列出你覺得需要嘅頁面，供網頁設計公司參考。
預計網站推出期限
事先了解網站推出時間有冇限制，例如要盡早推出配合展覽或者廣告。因為對於網頁設計公司而言，項目期限都係一個影響報價同設計方案嘅因素。一般品牌/公司網站嘅網頁設計流程最短都要4-6星期，由網站規劃、設計線框圖、網頁設計開發、內部測試、客戶驗收及修訂、到最後推出網站。當然如果採用現成網站模板，再將你已有嘅內容直接搬上去，只作少量修改，設計流程可短至1-2星期。如果要做充滿視覺效果或者功能複雜嘅網站，需時最短可增至10-12星期。
確定預算
參考一下網頁設計價錢指南，再諗一諗網站可以點為你嘅生意帶來點嘅回報，從而制訂一個預算。咁樣有助於你縮小選擇範圍同避免超支。所以喺同網頁設計公司討論項目時，最好要對你嘅預算透明，因為你嘅預算影響著設計方案、工作範籌、及推出時間等等。
總結
以上7件事帶望幫到大家做好準備（甚至自己DIY整網站時都可以作參考），同網頁設計公司合作時溝通好，做出一個幫到生意嘅網站。要注意嘅係以上嘅內容唔需要諗到完美，最重要係有一個初步概念，可以比網頁設計公司有一個更清晰嘅初步了解。最後如果你需要搵人整網站，歡迎聯絡我哋，了解我哋可以點樣幫你建立一個帶來生意嘅網站。