點樣先係一個好嘅網站？吸引嘅介面設計定係順暢嘅瀏覽體驗？其實兩樣都好重要！一個虛有其表嘅網站，係無辦法令到用家對品牌留低好印象，但如果只著重功能，又無辦法喺市場中突顯自己，從而吸引到客群。
所以，當為自己品牌建立網站時就要考慮UI同UX。佢地個名雖然好似，但所涉獵嘅範疇係有唔同，而最重要係UI同UX係不可分割嘅，缺少任何一方都會影響用戶嘅使用體驗。咁到底咩係UI？咩係UX？
淺談 UI （User Interface）用戶介面
UI（User Interface）全名為用戶介面，著重介面外觀同所呈現嘅感覺。除咗考慮到設計美學，亦注重頁面嘅便利性，所以版面中每項視覺元素都同UI相關，例如按鈕設計、配色、字體、插圖及動畫等。簡單而言，當要設計網頁介面嘅視覺元素時就會需要UI。
咁UI係咪只講求美觀？
當然唔係！UI亦好注重用戶感受，只係主要用設計嚟配合UX嘅內容規劃，令用戶對網頁留低好印象。正所謂：「細節決定成敗。」UI設計師需要相當注重細節。所以，不論係字體大小、配色定圖像，每項元素都要經過精心設計。
出色嘅外觀設計唔止令到網頁更吸引，更重要係可以建立品牌形象，令品牌喺整個市場中更為突出。簡單舉例，當諗起鮮黃色、紅色同埋M字，相信唔少人都會諗起麥當奴，而佢地嘅網站同樣以相同配色為主，籍此特顯品牌形象。呢個例子正反映出不論係網站定App，UI/UX設計對品牌形象都發揮至關重要嘅作用，亦影響住潛在客戶點看待一個品牌。
淺談 UX（User Experience）用戶體驗
UX（User Experience ）全名為用戶體驗，著重於用戶需求同使用習慣， 確保瀏覽網站嘅過程係合乎用戶嘅期望，所以用戶研究（User Research）、介面嘅內容鋪排及使用體驗都會同UX相關。
UX對於網頁設計嘅前期係相當重要，除咗要考慮到網頁嘅功能性，最主要係研究使用者嘅行為並作出分析。所以，UX設計師會透過實用性測試（Usability Testing），嚟觀察用戶同網站嘅真實互動，從而制訂出一套流暢嘅用戶體驗，確保用戶喺使用過程中唔會有任何障礙。
咁UX係咪只做用戶研究，唔會考慮到設計？
其實UX都要考慮到頁面設計，例如介面中嘅資訊架構（Information Architecture ）、圖文嘅擺放及按鈕嘅互動形式等，都係UX要考慮嘅範圍。只係UX比較著重於骨幹設計（Wireframe、Prototype）、網站地圖（Sitemap）等網站結構上嘅安排，令到用戶瀏覽網站時更易搵到想要嘅資訊，從而提升使用者體驗。
一圖了解UI、UX相異
簡單而言，UI著重呈現比使用者嘅感覺，UX則重視使用者嘅體驗。雖然UI同UX所涉獵嘅範圍有所唔同，但都有互相重疊嘅地方。
| UI （用戶介面） | UX（用戶體驗） | |
| 定義 | 使用者同”產品/服務”連繫嘅介面 | 使用者對”產品/服務”嘅體驗 |
| 重視 | 呈現比使用者嘅感覺介面嘅外觀及互動 | 使用者行為及習慣使用過程嘅邏輯同功能 |
工作項目 | 字體設計、字型大小、用色、插圖、動畫效果等 | 用戶研究、骨幹設計（Wireframe、Prototype）、使用流程、網站地圖（Sitemap） |
| 網頁嘅互動設計、內容鋪排 | 網頁嘅互動設計、內容鋪排 | |
| 出發點 | 提升用戶體驗及滿意度 | 提升用戶體驗及滿意度 |
UI/UX設計係點樣互相配合？
上文都提到UI同UX係相輔相成嘅關係，兩者都同等重要，咁成個設計流程到底係點？
大多數情況下，網頁設計都會先完成UX，再考慮UI。情況就同起屋一樣，要先了解屋主嘅需求同生活習慣，再去規劃屋內嘅空間同所需傢俬，之後再為屋主設計個人化嘅房屋，考慮牆色同傢俬風格。
同樣地，當要打造網站，了解用戶需求同習慣就係第一步。當完成用戶研究後，UX設計師就會按分析規劃整個網站嘅瀏覽流程，打造出網站嘅骨幹，再交比UI設計師為網站進行外觀上嘅設計，為網站進行配色、制定字體風格、加入插圖及動畫效果等。當完成初步設計後，又會再經實用性測試嚟進一步提升網站嘅使用體驗，多數要經過數次嘅測試同改善，先會有最後成品。
UI/UX對網頁設計有幾重要？
一個內外兼備嘅網站就要做好UI同UX，透過兩者互相配合，一嚟提高網站轉換率，二嚟建立品牌形象。
透過UX嘅用戶研究可更了解使用者習慣，從而設計出更貼心嘅服務。以內容鋪排為例，按用戶認為重要及次要嘅嘅資訊以邏輯擺放，會令用戶輕易搵到想要嘅資料，大大提升使用體驗，自然有助提高網站轉換率。其次，一個配有UX嘅網站，會按使用者習慣設計每一步嘅行動，從而提升瀏覽體驗，令用戶對品牌留低好印象。
另外，對於想增加營銷嘅網店而言，就需要注意行動呼籲按鈕（Call To Action Button）， UX設計師會為CTA按鈕創作注目嘅字眼，如： 限時優惠、瀏覽建議等，並放喺當眼處嚟吸引用戶去瀏覽更多內容，從而增加銷售。
而UI就係令到網頁介面更上一層樓，透過字形、圖像、用色及版面設計等強化品牌形象，加深同用戶嘅聯繫。此外，UI亦可以運用設計嚟吸引用戶作出行動，例如透過增強按鈕同背景嘅顏色對比，令CTA按鈕更為顯眼。此外，恰當嘅用色亦會有助使用者了解每個動作，當出錯時顯示紅色、正確時顯示綠色，會令用家對網站使用體驗更為滿意，自然會降低跌出率（Bounce Rate）。所以，UI唔止係設計美學咁簡單。
結論
總括而言，UI同UX嘅關係密不可分，一個出色嘅網站除咗要有吸引嘅介面，更要重視網站帶比用戶嘅體驗。只有透過UI同UX嘅通力合作，先可以打造出一個成功嘅網站。希望大家係設計網站時，都要記得兼顧兩者，唔好顧此失彼。