所有文章

5分鐘了解URL及網址結構 | URL同Domain域名嘅分別喺咩?

呢篇文章會講解「網址」,解釋URL嘅用途同結構,以及域名同URL Slug嘅關係,更會講下一個好嘅網址嘅重要性。立即花少少時間了解清楚咩係網址啦!

網址係指喺互聯網上面唔同嘅網頁或者資源嘅位置。如果你要去一個網站、睇一段片、下載一張相,你都要用網址去定位到佢。就好似我哋要去一間餐廳,就要知道佢嘅地址一樣。

咩係網址同URL?

網址其實只係一個俗稱,學術講法係叫URL(Uniform Resource Locator統一資源定位器)。URL顧名思義就係一堆由特定結構組成嘅字串,專門用作定位唔同嘅資源,包括喺互聯網上嘅資源。而網址就係講緊用作定位互聯網上資源嘅URL。

網址最基本嘅作用就係喺網頁同網站之間跳轉。例如你想睇一個網站入面嘅某一個頁面,通常你會撳網頁入面嘅超鍵結跳去嗰一頁,而超鍵結入面其實就包含咗該頁面嘅URL。而唔同嘅圖片、影片、聲音檔都係透過URL去加入網頁之中。

URL嘅結構

URL嘅結構一般都係咁樣:[Protocol]://[Domain Name]/[Path或者Slug]

URL當中嘅Protocol係指通訊用嘅協議,例如 HTTP、HTTPS、FTP 等等。

Domain Name係域名,例如 「google.com」、「yahoo.com.hk」、「facebook.com」 等等。

Path或者Slug係指網站嘅路徑,例如 /home、/about、/products 等等。

通過完整嘅URL,各類程式就會知道用咩方法同去邊度搵到指定嘅資源。以網頁瀏覽器為例,透過URL就會知道網站位置及所需網頁頁面。

URL與域名嘅關係

域名喺URL嘅一部份,而域名嘅作用喺指向伺服器嘅IP Address,因為你要先知道資源放係邊個Server上,你先可以係嗰個入面搵到你要嘅資源。而喺網站架設層面上,域名可以叫做係一個網站嘅名稱,例如 「google.com」、「facebook.com」;而URL則係指向該網站特定頁面嘅完整網址,例如「https://google.com」、「https://facebook.com」、「https://hk.news.yahoo.com/weather/」。

咩係 URL Slug?

URL Slug(一般簡稱Slug)係指網址中Domain Name之後的部分,通常用於指定內容喺網站內嘅位置,從使用者角度嚟講可以將佢等同於Path。假設網站入面有一篇文章,佢嘅網址可以係「https://www.example.com/articles/123」,其中「articles/123」就係 Slug。Slug可以包含關鍵字,喺一定程度上有助於提高網站在搜索引擎嘅排名,令到更多人可以搵到你嘅網站同埋內容。

好好運用Slug亦可以令URL嘅結構同設計更加容易記住同理解,同時反映出網站結構。例如「https://www.example.com/products/shoes/sneakers」,使用者可以清楚咁見到呢個網站有一個 products同shoes嘅分類,而喺再底下有一個sneakers嘅頁面或者分類。咁樣嘅設計會令到用家體驗更好、亦會令搜尋器更容易地檢索網站嘅內容。

點解要整好啲網址?

整好啲網址有唔少好處。從域名部份開始,有好嘅域名可以令到人更容易記住你嘅網站,如果域名太長或者太難拼寫,就會容易令人混淆,更難正確地打落網址欄。而且你嘅網址會出現唔同地方上,例如卡片或者Instagram Profile入面,如果域名太過長同寄怪,就會影響到潛在客戶對品牌嘅印象。

其次係好嘅網址有助於提高網站喺搜索引擎嘅排名。如果你嘅URL Slug包含關鍵字,搜索引擎就會更容易明白你嘅網站係咩嘢,從而提高你嘅排名,當然網頁內要有相應及有質素嘅內容。

最佳網址做法

當你決定要建立一個網站時,選擇一個好的域名和URL Slug結構喺非常重要的。以下喺一啲關於網址最佳做法,希望可以幫到你嘅網站有一個更好嘅網址。

  1. 選擇一個簡潔且易於記住嘅域名。域名長度夠短就會易寫易背,可以幫助你嘅網站在潛在客戶腦海中留下更深刻嘅印象。
  2. 選擇一個不含有hyphen嘅域名。雖然hyphen可以幫助區分詞語,但係如果域名中有hyphen,會容易令人感到困惑和混亂。同樣地要避免使用數字,咁樣都可能會導致混淆和拼寫錯誤。
  3. 如果心儀嘅名稱喺傳統的.com上已被注冊,嘗試選用其他常見的頂級域名/國家及地區頂級域名,例如.io、.ai、.tw、.hk等。這些頂級域名可能比傳統的.com、.net、.org等更具吸引力,同時還可以區別你的網站和其他網站。使用返潛在客戶地區嘅地區頂級域名亦係好嘅選擇,因為有助網站SEO。
  4. 網頁選用精簡且包含關鍵字的Slug。最好要簡潔易明,並包含內容針對嘅目標關鍵字,當中可以使用數字及hyphen。咁樣使有助於提高網站喺搜索引擎結果中嘅排名。

希望以上關於網址同URL嘅文章幫到大家。如果你想得到更多嘅網上推廣資訊,請訂閱我哋嘅電字報,我哋會不定期推出最新嘅網上推廣知識同技巧。最後如果你有任何網頁設計同埋網站推廣上嘅問題,歡迎聯絡我哋,睇吓我哋有冇嘢幫到手!