內容行銷Content Marketing簡介

要打造具潛力及有價值嘅內容嚟吸引客戶,有咩重點要留意?內容行銷又要點規劃?SEO同內容行銷又有咩關係?一文理解內容行銷Content Marketing策略。

內容行銷簡介

當考慮到行銷策略時,都會聽過內容行銷(Content Marketing),但到底咩係內容行銷?又應該要點樣開始?

內容行銷係咩?

內容行銷係指以多形式內容如網誌、短片、多媒體、電郵及舉辦活動等嚟吸引潛在客戶嘅行銷策略,而行銷內容既講求有吸引力,亦要為客戶提供想要嘅資訊。所以,內容行銷並唔會拘泥於任何形式,而係按照目標客群嚟制定內容及宣傳方法,嚟達到同顧客建立良好關係嘅目標。 成功嘅內容行銷係可以透過不同形式嘅內容嚟加強品牌同顧客嘅連繫,令客群喺有需要嘅時候,會優先選擇公司品牌。

以內容行銷提升品牌形象

當規劃行銷策略時,唔少公司都會將重心放係產品或服務,但其實品牌形象都係相當重要。無可否認地,推廣品牌比起具體嘅商品或服務會更難以入手,但其實品牌行銷係可以由數個角度嚟切入,例如:分享品牌嘅故事、理念及形象等,配合埋多元化嘅表達方式,如:圖像、風格及口號等,就可以自然地展現出品牌嘅特色。

提升品牌知名度(brand awareness),唔止令客戶對公司留下深刻嘅印象,仲有助品牌喺市場中更為突出。其次,公司亦可透過推廣品牌嘅故事及理念,從而同客戶建立信任,令佢地相信品牌喺所屬領域中嘅專業性及權威。

然而,品牌行銷係需要內容行銷嘅支持,以紮實嘅產品資訊及內容嚟加強客戶對品牌嘅信心。此外,為咗有效地接觸到客戶及潛在客戶,品牌行銷係亦需要SEO嘅配合,嚟提升品牌嘅曝光率。其次,品牌行銷並非短期提升業績嘅策略,而係需要長期嘅投放。簡單而言,當要打造長遠及有效嘅品牌行銷就需要內容行銷及SEO嘅配合,從而令到品牌係市場中鶴立雞群。

內容行銷的四個階段

當公司要規劃內容行銷嘅方向時,除咗要考慮到品牌嘅長短處同市場定位,亦可納入行銷漏斗(Marketing Funnel)嘅概念。行銷漏斗主要用於分析客群嘅消費行為模式,以AIDA模式為例,消費者決定消費時會有四個階段,分別為關注(Awareness)、興趣(Interest)、渴望(Desire)及行動(Action)。然而,每個階段都會有一定嘅流失率。為達到營銷目標,行銷內容嘅方向就要因應不同階段而有所調整,而配合到客戶嘅消費模式為主,打造有價值嘅內容嚟吸引各階段嘅客群。

關注(Awareness)階段:

為得到客群嘅正面反應及吸引潛在客戶,設計內容時要以解決客戶問題為方向,留意佢地使用相關產品或服務時遇到嘅困難,並提供可行及實用嘅建議, 避免硬性推銷自己嘅品牌,以解決問題為主,令佢地對品牌有好印象。

興趣(Interest)階段:

內容要做到加深客戶對品牌了解嘅目的,所以內容唔止要實用,同時要具說服力,突出品牌嘅優勝之處,例如講解產品嘅特性同點幫助用戶解難。

渴望(Desire) 階段:

內容可專注於推銷品牌嘅長處及特性,令客戶產生興趣同需求,帶出品牌係最合適客戶嘅訊息,所以內容要更為細緻同具備專業性。

行動(Action)階段:

縱然客戶已經決定消費,但其實仲有更長遠嘅目標—培養忠實客群(Loyal customers ),提升客戶忠誠度唔止會令客戶回購,亦會令客戶向身邊人推薦品牌。為咗加強品牌同客戶嘅關係,提供售後服務及詳細教學等嘅內容,會令客戶對品牌更有信心。

簡單而言,因應消費模式嘅階段不同,行銷內容方向都要有所調整,而唯一不變嘅係內容行銷要以客戶為重心,並唔係只硬式推銷產品/服務。

點樣規劃內容行銷策略?

以上就提及到內容行銷可按照客群嘅消費摸式嚟訂立方向,但又應該點樣開始內容行銷?以下將會簡介四個步驟。

四步規劃內容行銷

第一步:制訂行銷策略

首要嘅步驟就係分析客群,要了解自己嘅目標客群同潛在客戶嘅特質,例如消費習慣、偏好同需求。當了解到客戶喺尋找相關服務或產品時嘅行為,就可按此為創作內容嘅方向,滿足客戶需求。

此外就係訂立內容方向,除咗應用行銷漏斗嘅概念,都可先進行簡單市場調查。以網誌為例,當撰寫文章前可先進行關鍵字研究,借此分析用戶需求。同時,將用戶搜索用字鋪排於內容當中,亦會更易接觸到目標客群。

其次就係選擇合適嘅發佈渠道,內容嘅分發途徑都會對行銷成效造成影響,所以要思考發佈平台能否配合到內容,及所用嘅途徑可否接觸到客戶。例如:實用嘅文案更適合以網誌形式撰寫,透過網絡平台亦會更易接觸到客戶。

第二步:創作內容

當己訂好題目及方向,就可以開始撰寫內容。網上有唔少文案創作嘅提議,如使用倒金字塔結構、善用圖像等。以上嘅方法固然有用,但代入客戶先係最重要。

上次曾提及到UIUX,但UIUX對內容行銷又有咩幫助?雖然UIUX同內容行銷好似無關,但兩者其實都係圍繞住用戶。透過用戶研究(User Research)可以更掌握到用戶需求,而用戶介面(User Interface)就有助提升介面嘅易讀性,令讀者更易吸收內容。透過簡潔嘅版面設計及具邏輯性嘅資訊鋪排嚟加強用戶體驗,令到客群對品牌留低好印象,有助建立良好嘅客戶關係,從而提升轉化率。所以,當以網站作為內容行銷嘅媒介時,不妨多留意UI/UX同內容行銷嘅配合。

第三步:發佈內容

當完成內容及校對後,便可因應內容嘅特性而運用唔同嘅營銷渠道(Marketing Channel)嚟發佈,例如個人網站、Instagram、電郵行銷(Email Marketing)等嘅免費途徑,而付費渠道就有Google Ads、LinkedIn廣告、Instagram Boost Post等。雖然成本係決定發佈渠道嘅考量因素之一,但最緊要係行銷渠道同內容能互相配合。此外,亦建議紀錄每次撰寫文案所需嘅時間同成本,有助日後打造長遠及可行嘅計劃。

第四步:審視成效

完成發佈後,就係審視成效嘅好機會。公司可透過網站數據分析工具如Google Analytics、網頁熱點圖(Website Heatmap)或網站分析報告等嚟了解內容行銷嘅成效。以上工具都有助公司更具體地掌握客戶對內容嘅喜好及後續行動,如:網誌能否吸引到客戶訂閱email或查詢服務?當分析客戶對內容嘅反應後,便可確立下次嘅目標同方向,打造出更完善嘅內容行銷策略。簡單總結,進行內容行銷時最重要係要由用戶角度出發,及滿足用戶需求為主。

SEO同內容行銷嘅關係

當有吸睛同實用嘅網頁內容, 下一步就係要諗點爭取曝光,而搜索引擎優化策略(Search Engine Optimization)就起咗關鍵嘅作用,將文章成功呈現喺潛在客戶眼前,令內容行銷事半功倍。

而且,透過搜索引擎優化策略可更能理解用戶搜索意圖同用字,有助訂立關鍵字清單,令行銷內容有明確方向,創作讀者真正想要嘅資訊。此外, SEO都可以用嚟了解競爭者嘅表現,透過搜尋相關主題嘅最高瀏覽量網站,唔止可以掌握到讀者感興趣嘅內容,亦係大好機會嚟搵出新角度,避免內容重複之餘,更可發掘到具潛力嘅題材。

就以Bowtie 保泰人壽一篇《身體檢查2022》為例,呢篇網誌唔止每月有高達一萬嘅瀏覽量,網頁亦有不俗嘅排名,其優秀表現正正係結合內容行銷同SEO嘅成果。呢篇網誌除咗提供詳細嘅身體檢查資訊外,更重要係指出咗比較同建議,直接解決用戶對眾多計劃嘅疑問。另外,文章嘅鋪排亦相當細心,如:提供目錄、清晰標題同圖表等,都令用戶更快得到想要資訊。而且,恰當嘅關鍵字投放亦有助網頁被搜索引擎平台檢索,所以當有用戶搜索「身體檢查」時,都會見到呢篇具相關性嘅網誌。

透過SEO及內容行銷互補嘅特質,唔止會成功提高曝光率及免費嘅自然流量,內容嘅投放亦會更為準確,更易接觸到潛在客戶,令內容行銷更成功。簡而言之,SEO嘅作用就係令內容得到關注 ,而內容行銷就係填補SEO對內容嘅需求。

結論

總括而言,內容行銷要以客戶為重心。當訂立內容行銷策略時,記得要清楚自己嘅目標同方向。到底係想吸引潛在客戶定提高客戶忠誠度?客戶又有咩特質同消費習慣?點樣嘅發佈形式先會接觸到目標客戶?其實只要正確地策劃同執行內容行銷策略,並加上SEO嘅幫助,自然會有長遠及正面嘅收成。

Facebook
Twitter
LinkedIn
WhatsApp
Email

我哋嘅服務

幫助中小企利用網站增加生意

訂閱實用網上推廣資訊

資料只用作發送電郵並可隨時取消訂閱

目錄

響應式網頁設計(RWD)簡介

當手機已經成為必需品,手機版網站嘅需求就不容忽視,但點做好跨裝置網站設計?響應式網頁設計(Responsive Web Design)就係其中一個解決方法!

免費圖片素材網站

收錄多個提供高質素免費圖片素材網站,方便大家搵到想要又免費可供商用嘅Stock Photos。

Instagram字體攻略

想喺IG Bio或者Post度使用唔同特色嘅IG字體其實好簡單。立即了解如何生成IG特殊字體,等你嘅Bio同Post都更具特色。

簡介集客式行銷Inbound Marketing

透過傳統廣告行銷時遇上樽頸位,又唔知點解決?不妨了解集客式行銷(Inbound Marketing),唔再需要花費大量資源落廣告,做好內容就自然吸引到客戶。

想喺網上推廣你嘅生意?

想了解更多網上推廣貼士?

立即免費加入我哋嘅電郵名單,我哋會不定期發送相關嘅實用資訊同最新文章到你嘅電郵

所收集資料只用作發送電郵之用並且可隨時取消訂閱