網上廣告係唔少公司嘅宣傳策略之一，但點先知付費廣告有冇符合成本效益？常見嘅分析術語其實係咩意思？今次就一次簡介5個常見術語 — PPC、CPC、CPM、CTR、CPA。單靠縮寫的確會好易混淆，但只要理解佢地背後嘅概念同公式，其實就唔難區分。
PPC （Pay Per Click）
PPC全寫為Pay Per Click，中文係每次點擊付費。對曾推行SEM嘅公司而言，一定唔會對PPC感到陌生，點擊付費式廣告（PPC廣告）係相當普遍嘅投放廣告形式，有時公司會直接用PPC嚟代替全寫，但定義上PPC係付費模式嘅一種，即當每次有用戶點擊廣告，平台就會收取返相應費用。
CPC （Cost Per Click）
CPC全寫為Cost Per Click，中文為單次點擊成本。CPC用於計算平均獲得一個點擊所需嘅成本，借此評估付費廣告嘅成本效益，及定下期望目標（點擊次數）。所以CPC係牽涉到成本概念，並唔會用於計算付費式廣告嘅收費。例如Google Ads嘅關鍵字廣告係採用Auction競價嘅形式決定廣告排序及收費（最終嘅CPC）。
CPC嘅計算公式
廣告總成本/點擊次數＝CPC
簡單舉例，若廣告總成本為$2000，而點擊次數為50， 即每個點擊成本為$40。 由成本效益嘅角度出發，當每個點擊成本為$40，而公司可付出$2000廣告成本，目標點擊率就係50次。
CPC同PPC嘅分別
從字而上而言，PPC同CPC的確相似，但嚴格嚟講兩者係有所不同。PPC係計算每次點擊需付費用嘅落廣告收費方式，而CPC係計算每次點擊嘅落廣告成本。
CPM （Cost Per Thousand Impressions）
CPM全寫為 Cost Per Thousand Impressions，中文為每千次廣告曝光嘅成本。當公司要計算獲得一千次曝光嘅廣告成本時就會用到CPM。同樣係計算投放廣告嘅成本，但CPM並唔會用點擊次數作為計算方法，其次CPM係以一千次為計算單位。另外，CPM著重嘅係曝光次數，並唔係點擊次數，所以會用瀏覽量（Ad Views）、曝光次數為判斷。另外CPM亦同時係都可以係落廣告嘅收費方法，例如落喺Google Display Network嘅時侯。
然而，CPM亦延伸出一個問題—「點先算係有曝光？」，因不同投放廣告平台判斷曝光次數嘅準則都不盡相同，甚至乎無法判斷用戶有否留意廣告。所以，CPM不時會被質疑計算成本嘅準確度。雖然CPM並唔係最完善嘅分析指標，但就有助於比較不同投放廣告平台嘅成本。所以，當公司想搵出最合乎預算嘅廣告投放渠道就會用到CPM。
CPM嘅計算公式
（廣告總成本/總曝光次數）X 1000 ＝CPM
當公司付出$20,000，而總曝光次數為200,000，CPM就係$10， 亦即係廣告每千次曝光就需要$10嘅成本。
CTR （Click Through Rate）
CTR全寫為 Click Through Rate，中文為點擊率，最主要用嚟判斷廣告對用戶嘅吸引力。此外，除咗付費廣告會用到CTR嚟分析，其他嘅網絡行銷策略：如電郵行銷、展示形廣告（Display Ads）等都可以套用到CTR嘅公式。
CTR作為評估廣告成效嘅KPI（Key Performance Indicator )之一，咁到底CTR要幾高先屬於達標？其實公司嘅業務性質都會影響住CTR。就以WordStream嘅Google Ads統計數據為例，藝術同娛樂相關產業嘅平均CTR為10.67%，所以11-12%嘅CTR先代表有優秀嘅表現。
理論上，若廣告有越高嘅點擊率，亦代表住廣告能成功引起潛在或目標客群嘅注意力。但隨住網絡行銷日漸普及，現時嘅用戶多時都會跳過廣告，所以點擊率未必會有預期成績。此外，亦會有機會出現高CTR但低轉化率(Conversion Rate)嘅情況，因為Landing Page嘅設計亦會係影響轉化率嘅重要因素。
簡單舉例，如同派傳單一樣，即使有唔少人收到傳單但無客戶消費，都唔算係有效嘅宣傳（除非廣告目標係增加曝光率），變相公司白白付出一定嘅廣告成本。所以，CTR只係初步分析廣告效益嘅指標同埋衡量廣告嘅Copywriting嘅質素，要真正分析廣告成效係需要顧及不同因素。
CTR嘅計算公式
（總點擊率/總曝光率）X 100% ＝ CTR
如廣告有5000嘅曝光率，而點擊率為250，CTR就係5%。
CPA （Cost Per Action）
CPA全寫為Cost Per Action，中文為每次行動成本。簡單而言，CPA就係計算每個轉化行動(Conversion)嘅所需成本。當目標客戶經付費廣告接觸品牌後，並作出相應行動，如：購買、訂閱或登記成為會員等都計作轉化行動，再以總成本除轉化次數就係CPA。相比起，CPC或CPM，CPA會更反映出每個客戶行動嘅廣告成本，所以CPA係計算廣告成本效益嘅一大重要KPI。例如一間網店可以大約知道獲取一個客戶（如以購買次數計算）需要多少廣告成本。
CPA嘅計算公式
廣告總成本/轉化次數＝CPA
若公司投放廣告總成本為$20,000，而所得到訂單為100，即每次行動成本為$200。
總結
以上都只係簡單講解投放廣告時常見嘅術語同概念。對於想全面分析廣告成效，甚至計劃緊網絡行銷嘅公司而言，單靠以上嘅資訊係未必足夠。因為要優化網上廣告成效係需要多方面嘅努力，例如要事前做好Keyword Resaerch、寫好廣告文案、提升Landing Page嘅使用體驗、及作A/B Testing等等。其實我地除咗網頁設計外，都有做SEO/SEM。如果想知我哋可以點樣幫到你嘅生意，歡迎預約我哋嘅免費咨詢。